Magnús Stefánsson, betur þekktur sem Maggi Stef, hélt
fyrirlestur í skólanum í dag. Fyrirlesturinn heitir „Satt eða logið um kannabis“
frá Marita í boði Landlæknisembættisins.
Það var margt gott í fyrirlestrinum og hann var mjög
fræðandi. En svo fór Magnús að tala um markaðssetningu kannabis. Þá birtust á
skjánum hjá honum myndir af vörum með kannabisplöntunni og í bakgrunni voru
myndir af fáklæddum stúlkum með kannabismerkið húðflúrað á sig, aðallega
rassinn.
Magnús útskýrði myndbirtinguna svona: ,,Strákar hafa gaman
að því að horfa á stelpur, sérstaklega í þessu formi“ glennulegu klámmyndaformi
,,og stelpur vilja líta svona út.“
 |
| Ein af myndunum. (Alla vega áþekk.) |
Jahá. Í alvöru?
Ég er algjörlega sammála því að reynt sé að sporna við
eiturlyfjaneyslu. En ekki á kostnað sjálfsmyndar stúlkna.
Skv. Magnúsi er markaðssetningu kannabisefna aðeins og
eingöngu beint að ungum mönnum. Það er nú gott að henni er ekki beint að
stúlkum. Eða eiga stúlkurnar kannski ekki peninga? Hvernig skyldi nú standa á
því? Uppteknar af útlitinu, kannski, með lítið sem ekkert sjálfstraust?
Það er til fullt af myndum af mönnum með kannabis tattú.
Hann birti enga svoleiðis mynd. Það er til fullt af karlkyns listamönnum sem
styðja kannabisneyslu, margir mjög myndarlegir. Ekki ein einasta mynd af
slíkum.
Þegar ég gúggla ,,marijuana
marketing“ þá kemur ekki upp ein einasta glennumynd. Hvernig er sú
fullyrðing rökstudd að kannabisefni séu „markaðssett“ svona?
Má ég vinsamlegast biðja um að Landlæknisembættið sé ekki að
ýta undir átröskunarsjúkdóma og kvenfyrirlitningu.
