Nokkur orð um femínisma

Í gær rakst ég á myndband sem heitir Girl destroys feminism in 3 minutes! Myndbandið er, undarlegt nokk, að finna á síðunni Only for Men. Fólk getur kynnt sér síðuna. Þá vekur það athygli mína að málflytjandi er kynnt sem "girl" en ekki einstaklingurinn  Lauren Southern. 

Lauren Southern þarf ekki að vera femínisti mín vegna. Mér finnst verra að hún skuli fara rangt með máli sínu til stuðings. Jenna Christian rekur það ágætlega í spistli sínum A Reply to Lauren Southern.

Það sem mig langar að koma inn á er sú furðurlega krafa að konur eigi að berjast fyrir réttindum allra annarra líka. Helst fyrst. 

Vinsamlegast hafið þann fyrirvara að ég er ekki talsmaður allra femínista heimsins. Nei, við erum ekki í einni allsherjar sellu sem sendir reglulega út tilskipanir.

Lauren Southern skilur ekkert í því að femínistar beiti sér ekki fyrir réttindum karla.

Ábyrgir feður skildu  ekkert í því á sínum tíma að femínistar skyldu ekki beita sér fyrir réttindum forsjárlausra feðra.

Einhverjir skildu ekkert í því að femínistar skyldu ekki mótmæla hvataferð vopnaframleiðenda.

Gúglið bara "Hvar eru femínistar núna?" Af nóg er að taka.

Orðið femínisti kemur af orðinu femin sem merkir kona.  Femínistar vilja vinna að jöfnum rétti kvenna gagnvart körlum í heiminum. Við erum að berjast fyrir hálfu mannkyninu.* Er það ekki nóg?

Nei, það er ekki nóg af því að konur eru skv. mýtunni umönnunaraðilar og eiga fyrst að hugsa um alla aðra og svo sig. Þess vegna er svo mikilvægt að femínistar taki tillit til þarfa allra annarra, sérstaklega karla, áður en hugað er að réttindum og þörfum kvenna. 

Ég er orðin alveg rosalega leið á þessu.

Er þessi krafa gerð til annarra hópa? Voru samtök LGBT fólks spurð að því hvort þau mótmæltu hvataferð vopnaframleiðenda? Af hverju ekki?
Eru ábyrgir feður að beita sér fyrir réttindum kvenna? Af hverju ekki?

Af því það er eðlilegt að allir aðrir hópar einbeiti sér að sínum réttindum. Réttindi kvenna hins vegar mega sitja á hakanum.

* Reyndar tel ég að aukin réttindi kvenna komi körlum mjög vel og minnki ósanngjarnar kyngerviskröfur sem eru svo sannarlega gerðar til þeirra líka.

Bubbi, ég elska þig.

Ég held það hafi verið árið 1982, það var alla vega sama ár og hið stórkostlega félag Læðupúki sléttunnar var stofnað í hitakompunni í Álfheimunum. Gummi kom með gamlan ferðaplötuspilara og nokkara plötur, m.a. A Hard Day's Night með Bítlunum. En það var platan Breyttir tímar með Egó sem heillaði mig. Sú plata kom frá Diddu, nú skáldkonu svo ég neimdroppi aðeins. Litli bróðir hennar var í félaginu og kom með plötur. Plágan með Bubba datt líka inn í hitakompuna. Ég er enn með þessar plötur því Didda gaf okkur þær. Ég vona það alla vega, annars hef ég stolið þeim.

Eftir þetta var ekki aftur snúið, ást mín á Bubba var hrein og tær. Fullkomlega platónsk. Ég hélt því staðfastlega fram árum saman að

það væru textarnir en eflaust hefur tónlistin og Bubbi sjálfur átt þar stóran hlut að máli líka.

Eftir þetta keypti ég allt sem Bubbi gaf út. Fannst allt frábært þótt það væri misfrábært. Sögur Bubba (og Dóra) af landinu ýtti undir landsbyggðarómantík sem hafði þær afleiðingar að nú er ég virðuleg bóndafrú. Sem er kannski nokkuð undarlegt þar sem Bubbi söng um sjávarþorp og verbúðalíf. En það er svona. Ég fór nú samt líka í fisk.

Bubbi náði að snerta einhvern streng í sálinni á mér alveg eins og þjóðinni allri. Hann sló taktinn með samtíðinni og hjartað í mér sló í takt. Hann söng um það sem var að gerast hverju sinni. Hann söng líka um depurðina sem rímaði fullkomlega við unglingaangistina mína. Ég fílaði verkalýðsbaráttuna og töffaraskapinn. Mér fannst það ferlega væmið þegar hann söng um að Það væri gott að elska en verst þótti mér þegar hann fór að mæra Geir Haarde og útrásarvíkinga. Það voru svik við málstaðinn. En ég hélt áfram að fylgjast með. Ég veit alveg hvað Bubbi er að gera. Ég fylgist að vísu ekki með honum á samfélagsmiðlum, ég vil ekki láta manninn Bubba eyðileggja fyrir mér listamanninn Bubba.

En ástæðan fyrir þessum skrifum er að þetta misseri kenni ég ljóð og ljóðaskilning. Ég útbý efnið að nokkru leyti og reyndin er sú að ég dett alltaf í Bubba. Krakkarnir sögðu að það væri allt í lagi, ég mætti alveg kenna Bubba, mér fyndist hann greinilega bestur. Það er rétt, mér finnst hann bestur.

Bubbi, ég elska þig.

 

 

Konunglegt slekti

Ég hef verið að heyra það utan að mér að nemendum Þingeyjarskóla hafi fækkað talsvert undanfarið, jafnvel það mikið að húsnæði Litlulaugaskóla hefði dugað utan um hópinn. Sem betur fer til að minnka flækjustigið er verið að breyta því húsnæði svo ekki er hægt að bakka með þá ákvörðun.

Ég settist því við tölvuna og fletti upp á fundargerðum Fræðslunefndar til að athuga hvort eitthvað kæmi þar fram um nemendafækkun. Svo er ekki enda minnir mig að það sé yfirleitt bara fjallað um fjölda í byrjun skólaárs.

Hins vegar rak ég augun í annað. Í 4. lið fundargerðar Fræðslunefndar frá 3. 12. 2015 segir:

J... R... fór yfir dagskrá desembermánuðar í grunnskóladeild.

Hann fór einnig yfir aðkomu sérfræðinga að skólastarfinu. E.G. sálfræðingur hefur unnið með starfsfólki og I.S. hefur komið aðeins inn og kemur meira að starfinu eftir áramót. E.E.F. og A.K. sálfræðingar hafa einnig komið inn í skólastarfið. J.R. segist ánægður með aðkomu allra þessara aðila. (Leturbreyting mín.)

Afsakið, hvað!?
A.K. og E.E.F. eru væntanlega að starfa með nemendum. Það er nauðsynlegt að tryggja að nemendum líði vel í skólanum sínum og eðlilegt að slíkur vandi sé ekki leystur í eitt skipti fyrir öll þar sem sífellt koma nýir nemendur í skólann.  (Mér finnst þó afar óeðlilegt að eineltisvandi fái að grassera árum saman í skóla.)

E.G. er afar fær sálfræðingur (og mjög skemmtilegur fyrirlesari). I.S. er afar fær skólamaður og ég hef ekkert við aðkomu þeirra sem slíka að athuga. Það er líka fullkomlega eðlilegt að reynt sé að takast á við vanda og vanlíðan sem skapast á vinnustöðum. En þegar þarf að kalla út sérfræðiaðstoð ár eftir ár eftir ár þá er orðið ansi vel í lagt. Skólinn er ekki einkafyrirtæki. Við útsvarsgreiðendur í Þingeyjarsveit rekum þennan skóla og borgum allt sem að honum kemur.

Í andstyggðarbréfi sveitarstjórans stóð:

Fram hefur farið samanburður á hæfi allra starfsmanna skólans. Eftir yfirferð gagna og þeirra upplýsinga sem fyrir liggja, bendir vinna sem farið hefur fram á vegum sveitarstjórnar vegna skipulagsbreytinga til þess að aðrir starfsmenn standi þér framar þegar kemur að því að ákveða hverjir muni áfram gegna störfum við Þingeyjarskóla. 

Þið verðið að fyrirgefa en mér er fyrirmunað að skilja við hvaða vanda útvalið starfsfólk sem er svona miklu hæfara en annað og hefur í ofanálag fengið að velja með hverjum það vill ekki vinna getur átt við að etja.
Af hverju skilaði sálfræðikostnaður upp 1.5 milljón ekki kunnáttu og úrræðum til að takast á við slíkan vanda? Hvað kostar þessi aðstoð nú?

Ef það er rétt að nemendum hafi fækkað í skólanum þá má væntanlega gera ráð fyrir frekari uppsögnum sem vega þá upp á móti þessum kostnaði. Ef marka má reynsluna eru kennarar fv. Litlulaugaskóla í mestri uppsagnarhættu.

Hrós til sveitarstjórnar

Jæja, þá rann upp sá dagur.

Ég verð að viðurkenna að mér leist ekkert á fréttina hjá 641.is um fyrirhugað útboð um ljósleiðaravæðingu Þingeyjarsveitar. Ég óttaðist mismunun gagnvart íbúum, bæði varðandi kostnað og tíma, þ.e. að við Kinnungar og jafnvel Bárðdælingar mættum eiga von á að bíða lengur og borga meira. 

Í gær var tillagan svo lögð fram og kemur þá í ljós að meirihlutinn vill hafa ljósleiðaravæðingu sveitarfélagsins í einum pakka. Mismununarótti minn er snöggtum minni.

Það ber að þakka það sem vel er gert og geri ég það hér með.

Aldrei nóg af bókasöfnum.

Það er ýmislegt sem vantar í dreifbýlið, verslanir og þjónustu. En eitt af því sem vantar alveg örugglega ekki eru bókasöfn. Mér reiknast til að nú séu þrjú bókasöfn starfrækt í Þingeyjarsveit. Tiltölulega nýlega búið að sameina þrjú bókasöfn í Stórutjarnaskóla svo þeim hefur þó heldur fækkað. Ekki veit ég af hverju það þarf öll þessi bókasöfn, svona miðað við að við náum ekki þúsund hræðum. Þetta er kannski gamall baðstofusiður sem heldur velli í sveitinni. 

Kannski er eitthvað brjálað félagslíf í kringum bókasöfnin, allt bara hot and happening, ég veit það ekki.

Anyways...
Fyrir stuttu var Bókasafn Aðaldæla flutt með pompi og prakt úr kjallara Ýdala og yfir í skólahúsið. Það hefur nú væntanlega kostað eitthvað. Er kannski inni í 60 milljónunum sem fóru í viðhaldið í fyrra. Það er svo sem allt í lagi, það er algengt að halda úti skólabókasöfnum þótt ég sjái ekki að það sé skylda.

En svo ég komi mér nú að þessu.

Eins og fólk kannski rámar í þá voru sameinaðir tveir skólar í eitt hús í Þingeyjarsveit í fyrra. Ég gæti hafa minnst á það einu sinni eða tvisvar. Það þýðir að eftir stóð eitt hús ónotað. Ég man ekki hvort það komu einhvern tíma fram hjá vinum mínum heittelskuðum í Samstöðu einhverjar hugmyndir um í hvað ætti nota hið yfirgefna skólahús en það var alla vega ákveðið á sveitarstjórnarfundi þann 5.2.2015 eftirfarandi samþykkt:

„Sveitarstjórn samþykkir að leggja núverandi skólahús Litlulaugaskóla undir starfssemi er tengist mótvægisaðgerðum vegna breytinga í skólamálum sveitarfélagsins.

Innviðum húsnæðisins verður ekki breytt með varanlegum hætti á tímabilinu.

Bókasafn Reykdæla heldur aðstöðu sinni til að þjónusta íbúa með óbreyttum hætti.

Eldhúsið verður notað til að sinna verkefnum í tengslum við grunnþjónustu sveitarfélagsins og starfsemi sem verður í húsinu.

Þessi samþykkt gildi til næstu tveggja ára og tekin til endurskoðunar innan þess tíma.

Hugmyndin er að húsið verði umgjörð um starfsemi á sviði sköpunar, þekkingar, tækni, hugverka og handverks. Frekari hugmyndir um starfsemi í húsinu og umgjörð hennar verða unnar í samráði við íbúa sveitarfélagsins.

Sveitarstjóra og oddvita falið að vinna að framgangi málsins.“ (Leturbreytingar mínar.)

Ókey, ég er kannski ekki brattasta mannvitsbrekkan en mér finnst blasa við að ekki eigi að breyta neinu í tvö ár, frá 5. febrúar 2015 til 5. febrúar 2017. Það eru tvö ár, ekki satt?

Svo var ráðinn verkefnisstjóri mótvægisaðgerða frá 1. ágúst 2015-31. des. 2015. Það stendur í fréttinni: "höfuðáherslu á framtíðarnotkun skólahúsnæðis Litlulaugaskóla." Jú, allt í lagi. Síðan var Seigla stofnuð og ýmislegt í gangi.

Nú heyri ég utan að mér að ákveðið hafi verið að færa bókasafn Litlulaugaskóla af efstu hæðinni niður þar sem mötuneytið var og að sú aðgerð eigi að kosta litlar 10 milljónir króna. 

Eins og ábyrgum þjóðfélagsþegni sæmir trúi ég ekki öllu eins og nýju neti heldur sest við tölvuna og fletti upp á fundargerðum ástkærra leiðtoga vorra. Þar finn ég ekkert um breytingar á bókasafni fv. Litlulaugaskóla annað en þetta þann  12.11.2015: 

"Sveitarstjórn samþykkir framlagða kostnaðaráætlun vegna starfsemi Seiglu og vegna breytinga á Bókasafni Reykdæla og vísar til gerðrar fjárhagsáætlunar 2016."

 Ég finn ekkert um hvaða breytingar þetta eru né hvað þær eigi að kosta. Hins vegar er mér einnig sagt að framkvæmdir séu hafnar.
Kannski er það bara ég en eiga íbúar ekki rétt á að vita hvað valdhafar eru að sýsla með almannasjóði? Er ég of kröfuhörð?

Það eru ákveðnir hlutir hérna sem ég skil ekki:

Ef verið er að færa bókasafnið niður í mötuneytið (takið eftir ef-inu, því ég veit i rauninni ekkert hvað er verið að gera) hvernig á þá mötuneyti/eldhús fyrir Krílabæ að geta verið þar áfram?

Eru þetta ekki breytingar á innviðum hússins?

Er búið að taka endanlega ákvörðun um starfsemi Seiglu og að hún verði þarna til framtíðar? (Ég hef ekkert á móti því, mér finnst bara eðlilegt að íbúar viti af svona ákvörðunum.)

Er þá einnig búið að taka ákvörðun um að ekki verði reynt að selja húsnæðið?

Það eina sem mér sýnist öruggt er að grunnskóli verður ekki starfræktur framar í þessu húsnæði. Það er þá ágætt að það sé á hreinu.

Mér finnst líka svolítið fúlt hvernig hægt er að demba sér í sumar framkvæmdir eins og ekkert sé á meðan aðrar fá að sitja á hakanum. Það þarf t.d. að malbika planið fyrir framan Ljósvetningabúð en það er ekki hægt. Svo virðist þurfa að laga eitthvað við Goðafoss.

Svo þætti mér gott að fá einhvern rökstuðning fyrir þessari framkvæmd því ég sé ekki fljótt á litið neina þörf fyrir henni.

PS.
Það kostar ca. 20 milljónir að kaupa lesbretti fyrir alla íbúa sveitarfélagsins.

Ósköp voru rökin rýr...

Í aðdraganda og framkvæmd sameiningar Litlulaugaskóla og Hafralækjarskóla fannst mér alltaf eðlilegt að Hafralækjarskóli væri valinn. Hann er byggður sem skóli og hentar betur til skólastarfs að mínu auðmjúka áliti. Hins vegar ræð ég ekki neinu og strangt tiltekið skiptir mitt álit afar litlu nema á fjögurra ára fresti þegar ég greiði atkvæði.

Í desember þegar ég var nýbyrjuð í jólafríi og var í verkefnafráhvarfi setti ég saman bækling um skólamálaumræðu í sveitarfélaginu frá síðasta bæklingi. Ég las eða skimaði yfir allar greinar og sá þá að Samstaða setti fram mun rýrri rök fyrir flutningnum í Hafralækjarskóla en mig minnti.

Í kosningabaráttunni lagði Samstaða áherslu á fjárhagslega hagræðingu sem myndi nást með sameiningunni.

Sjá t.d hér. (bls.3)

Svo voru skrifaðar skýrslur og þær voru kynntar. Þar kom fram:

 Bjarni Þór Einarsson byggingatæknifræðingur gerði mat á rýmisþörf og ástandi á núverandi skólahúsnæði á báðum starfsstöðvum og gerði grein fyrir því á fundinum. Hans mat er að húsnæði Hafralækjarskóla sé yfirdrifið og rúmi vel alla nemendur Þingeyjarskóla. Húsnæðið þarfnast þó mikilla endurbóta og metur hann viðhaldsþörfina á húsnæði Hafralækjaskóla upp á 477 milljónir króna, ef koma á húsnæðinu í gott stand. Það væri þó hægt að framkvæma það vildhald á lengri tíma. Ástand húsnæðis Litlulaugaskóla er gott en það rúmar ekki alla nemendur Þingeyjarskóla. Til þess að svo megi verða þarf að byggja við skólann og metur hann kostnaðinn við það vera um 250-300 milljónir króna. (bls. 20)

Það verður ekki fram hjá því litið að Litlulaugaskóli rúmar ekki alla nemendur Þingeyjarskóla en það er samt ódýrara að byggja við Litlulaugaskóla en að koma Hafralækjarskóla í „gott stand.“

Samstaða lagði svo til á sveitarstjórnarfundi að starfsemin yrði flutt í Hafralækjarskóla. Engin greinargerð fylgdi með þeirri tillögu af því að ekki átti að „leggja fræðslunefnd til forskrift“ áður en hún fengi tillöguna til umfjöllunar. Hvernig einhverjum getur mögulega dottið í hug að það að meirihluti sveitarstjórnar leggi eitthvað til og vísi svo til undirnefndar sinnar sem er skipuð af því sama fólki sé ekki forskrift er með ólíkindum en það er eins og það nú er.

Að vísu sendi Samstaða íbúum bréf á síðu Þingeyjarsveitar þann sama dag og greindi frá hinum mörgu ástæðum sínum fyrir tillögunni. Þær eru:

·         Húsnæði Hafralækjarskóla uppfyllir allar kröfur sem gerðar eru til skólahúsnæðis. Húsnæðið er tekinn út eins og annað opinbert húsnæði með reglulegum hætti af eftirlitsaðilum s.s. Eldvarnareftirliti, Vinnueftirliti og Heilbrigðiseftirliti.*

Ber að skilja þetta sem svo :

a) að húsnæði Litlulaugaskóla uppfylli ekki allar kröfur sem gerðar eru til skólahúsnæðis? Samt hefur skóli verið starfræktur þar áratugum saman.

b) að húsnæði Litlulaugaskóla hafi ekki verið tekið reglulega út með opinberum hætti af eftirlitsaðilum?! Hvernig má það vera og hver ber ábyrgð á því!?

·         Skólinn er miðsvæðis með tilliti til skólaaksturs

Ég ber ekki á móti því. En bendi á að þegar Stórutjarnaskóli verður settur í pottinn þá er hann miðsvæðis og ég ætlast til að þessi rök standi líka þá.

·         Skólinn er vel búinn og í ágætu ástandi

Er hann betur búinn en Litlulaugaskóli? Hvernig stendur á því? Af hverju er skólum sveitarfélagsins mismunað varðandi búnað?

Bjarni Þór Einarsson sagði í sinni skýrslu að húsið værið komið í „verulega viðhaldsþörf.“ Ef það er „ágætt ástand“ þá vil ég ekki vita hvernig þau skilgreina slæmt ástand.

·        

 Skólinn hefur mikið og gott pláss og aðstöðu til að kenna flestar greinar

Litlulaugaskóli hafði hvorki mikið né gott pláss en hann hafði aðstöðu til að kenna flestar greinar og gerði það.

Stórutjarnaskóli hefur enn meira og betra pláss til að kenna flestar greinar bara svo því sé haldið til haga fyrir framtíðina.

·         Skólinn hefur aðgang að Ýdölum til notkunar fyrir íþróttir, leiksýningar, hátíðarhöld og samkomuhalds

Litlulaugaskóli hafði aðgang að íþróttahöllinni svo ég sé ekki alveg vigtina í þessu.

·       

  Skólahúsnæðið er í eigu sveitarfélagsins og hægt er að flytja alla starfsemi þingeyjarskóla í húsnæðið án mikils kostnaðar

Öh, gildir ekki það sama um Litlulaugaskóla?

·        

Húsnæðið krefst viðhalds sem hægt er að halda innan viðráðanlegra fjárútláta á næstu árum

Reynslan hefur sýnt að „viðráðanleg fjárútlát“ eru talsvert sveigjanlegt hugtak.

·        

Við getum ekki réttlætt það að byggja nýjan skóla á Laugum þegar sveitarfélagið á húsnæði sem uppfyllir allar kröfur sem gerðar eru til skólahúsnæðis

Það er alveg sjónarmið (og ég minni aftur og enn á hið ágæta húsnæði Stórutjarnaskóla.) Hins vegar var ekki nauðsynlegt að byggja nýtt hús, það nægði að byggja við. Skv. skýrslu Bjarna er viðbyggingin ódýrari en kostnaðurinn við að koma Hafralækjarskóla í „gott stand.“

Út frá hagkvæmnissjónarmiðum var það ekki rökrétt að flytja skólann að Hafralæk nema fyrir þá sök sem fram kom á fundi Foreldrafélags Litlulaugaskóla og Krílabæjar:

Fulltrúar meirihlutans ... tóku það jafnframt fram að ekki stæði til að fara út í 250 milljóna króna viðhaldsframkvæmdir á Hafralækjarskóla, sem samkv. skýrslu Bjarna Þórs Einarssonar þyrfti til, ef koma á húnæðinu á Hafralæk í gott stand. (bls. 45)

Vissulega vil ég að gætt sé aðhalds í fjármálum sveitarfélagsins en ég vil samt frekar að vel sé um börn sveitarfélagsins búið. Ég kann því illa að börn séu látin eyða lungann úr deginum í húsnæði sem uppfyllir ekki kröfur um góðan aðbúnað.  

Þau rök sem Samstaða setti fram til stuðnings ákvörðun sinni eru ósköp veigalítil þegar grannt er skoðað. Það er slæmt því það ýtir undir þann grun margra að ákvörðun hafi legið fyrir löngu áður en út í ferlið var farið. Það sem síðan hefur gerst gerir lítið annað en að styrkja þann grun.

*Málfræðivillan er í upphaflega bréfinu. Beinar tilvitnanir verða að vera trúar uppruna sínum.

Þorrablótspistill

Aðalþorrablót Þingeyjarsveitar var í gær, þorrablót Ljósvetninga í Ljósvetningabúð.

Þar var etið, drukkið og glaðst og allt hið besta mál. 

Það er samt eitt sem ég verð að koma inn á þar sem eitt af mínum helstu stefnumálum í meintu forsetaframboði er að koma út piparsveinum.

 

Hér er mikið af einhleypum körlum og meira af körlum en konum á landsbyggðinni almennt. Svo ég

verð að segja: Strákar, hvað á það eiginlega að þýða að hanga einhvers staðar utan danssalar og kjafta við hvern annan? Á sama tíma sitja einar konur við borð. Í alvöru, þetta er ekki í lagi. Þið skuluð ekki dirfast að kvarta yfir fólksfækkun á landsbyggðinni ef þið axlið ekki ykkar samfélagslegu ábyrgð!

Ég er ekki að ætlast til að fólk komi lofað af þorrablótum en ég ætla að vera eins og hrafninn sem miðar allt við sjálfan sig og fullyrða að það er miklu skemmtilegra að vera á böllum ef maður dansar. Svo má vona. 

Ein móðir sagði mér eitt sinn að sonur hennar piparsveinninn reyndi að bjóða upp en stúlkurnar afþökkuðu flestar alltaf pent. Auðvitað er höfnunin alltaf erfið, líka fyrir karlmenn, svo það er ekki skrítið að þeir gefist upp á endanum. Þannig að ég ætla ekki að láta strákana eina bera ábyrgð á þessu. 

Ég veit svo sem ekki hvernig á að leysa þetta vandamál (og já þetta er vandamál, hugsið um fækkun skólabarna for crying out loud!) En á sínum tíma þegar ég var í þorrablótsnefnd þá var ég að möndla með hugmynd um danskort. Að allir piparsveinarnir fengju danskort og þeir sem fengju staðfestingu x margra kvenna um dans settu danskortið sitt í pott og gætu unnið verðlaun (eitthvað svona macho bænda shit eins og þeir hafa áhuga á. ) Það yrðu náttúrulega settar reglur um lágmarksaldur kvenna og giftar konur mættu ekki kvitta og svoleiðis. Alla vega að eitthvað yrði gert til að ýta á garpana til að bjóða upp konunum sem sitja og horfa á aðra dansa. Sem er glatað strákar og þið að kjafta frammi. Glaaataaað. 

Ég fékk þessu að vísu ekki framgengt þar sem upp kom ótti um að gæjarnir þyrðu ekki að mæta. Hversu sorglegt er það?

Þorrablótsvertíðinni er að ljúka núna en ég hvet nýjar nefndir til að setja þetta í hux.