Það hefur lítið verið bloggað undanfarið. Ég komst heim aðfararnótt þriðjudags eftir 5 klukkutíma bið á Kastrup. Það var ekki gaman að ganga inn á stútfullan og stressaðan flugvöllinn eftir næstum 7 tíma lestarferð og frétta af verkfalli hleðslumanna og sjá hverju fluginu á fætur öðru frestað. En ég komst heim að lokum.
Prófin höfðu safnast saman á meðan ég fór í fermingu og það er ekki gert ráð fyrir því í vordagskrá grunnskóla að farið sé yfir þau. Dagarnir núna eru fullskipaðir leikjum og gamni. Eða ,,vesenisdögum" eins og fulltrúi í unglingaráði Hafnarfjarðar nefndi þá svo réttilega. Kennarar geta bara setið fram eftir yfirvinnulaunalaust í skólanum nú eða bara unnið launalaust heima hjá sér á kvöldin og um helgar. Ekkert nýtt þar svo sem.
Það var verið að kjósa um verkfallsboðin og ég ætla rétt að vona að hún verði samþykkt. Annars getum við bara beygt okkur fram og leyft viðsemjendum okkar þið vitið hvað.
O, seisei. En að öðru. Ég er búin að panta ítarlega rannsókn hjá Hjartavernd. Ég hef tilhneigingu til að safna á mig bjúg og mútta hefur milar áhyggjur af þessu þar sem það eru alls konar hjartavandamál í ættinni. Ég er sannfærð um að ég sé healthy as a horse enda aldrei fundið fyrir neinu. En nú er ég að stressast öll upp út af yfirvofandi rannsókn og verð örugglega komin með alltaf háan blóðþrýsting og óreglulegan hjartslátt þegar ég mæti. Vona bara að ég verði ekki send akút í aðgerð!

Ó, ég þakka hlý orð í minn garð. Ég er sein til svars þar sem ég, fátæki kennarinn, brá mér út fyrir landsteinana. Fór auðvitað með Iceland Express og lagði á mig 12 tíma ferðalag til að hafa þetta sem ódýrast. Litla frænka er að fermast í Svíþjóð svo við kerlingarnar ákváðum að bregða undir okkur betri fætinum.
Ég ákvað að byrja ,,aftur" að blogga þar sem kjarabaráttan er alveg að fara með mig. Eftir að hafa unnið brjálaða yfirvinnu í allan vetur en fá alltaf sama brandarablaðið heim til mín mánaðarlega þá er maður orðinn dálítið pirraður.
Grunnskólakennarar sömdu mjög illa af sér síðast og við vitum það öll. En auðvitað er það hægara sagt en gert að fá aftur það sem er búið að semja af sér. Launanefnd sveitafélaganna hlær líka bara upp í opið geðið á okkur núna. Hún leyfir sér að bjóða okkur upp á ,,hámarkslaun", einu stéttinni í öllu landinu. Allir aðrir semja um lágmarkslaun. Þá dirfist hún líka að fara fram á að sveitafélögin fái að fara með puttana í endurmenntunarsjóðinn okkar. Að hún fái sem sagt að ráðstafa okkar peningum! Ef kennarar láta bjóða sér þetta kjaftæði og samþykkja ekki verkfalssboðun þá er þessi stétt búin að segja að við látum bjóða okkur hvað sem er. Það hefur auðvitað í för með sér gríðarlegan flótta úr stéttinni. Ég er líka með framhaldsskólakennararéttindi og fer um leið og ég fæ stöðu og ég veit að fleira fólk er farið að hugsa sér til hreyfings.

Bætti Danna frænda á linkalistann. Hann er náttúrulega í fyrsta lagi frændi minn og svo í öðru lagi kennari. Spurning að maður fari að bæta aftur fleira frændfólki við. Hmmm....

Strax búin að finna fleiri kennara. Ég mun dunda mér við þetta næstu daga. Ég hef nefnilega ekki nóg að gera í prófahrinunni sem er að dynja yfir, eða þannig.

Ég er að fikta mig áfram í þessum nýja blogger. Ákvað að setja upp tengla og ætla mér, af eintómum skepnuskap auðvitað, að reyna að finna sem flesta kennara. Kennarar mega nefnilega líka blogga. Við njótum líka almennra mannréttinda sem fela m.a. í sér skoðana- og tjáningafrelsi. Og hananú!
Ég veit af Erlingi og er búin að linka á hann svo nú er bara að finna fleiri. Ég veit af þeim, ég hef rekist á þá á flandri mínu um vefinn. Ég man bara ekki alveg slóðirnar í augnablikinu.

Auðvitað erum við best en svei mér þá ef við erum ekki bara langsætust líka:)

Loksins hafðist það. Bendi vinsamlegast á þetta. Algjört must see.